|
Fil-biċċa l-kbira tagħha, apparti mill-pjanura tal-Po fir-reġjun ta’ l-Emilja-Romanja, l-Italja hija pajjiż muntanjuż li jestendi mill-Alpi saċ-ċentru tal-Baħar Mediterran. Fi ħdanha hemm ukoll il-gżejjer ta’ Sqallija, Sardinja, Elba u xi 70 gżira oħra iċken minnhom. Imdawrin kollha kemm huma mit-territorju peninżulari Taljan, insibu żewġ stati indipendenti ċkejknin: il-Belt ta’ Vatikan f’Ruma, u r-Repubblika ta’ San Marino. L-Italja għandha parliament b’żewġt ikmamar, li jikkonsisti fis-Senat (Senato della Repubblica) jew kamra superjuri u l-Kamra tad-Deputati (Camera dei Deputati). L-elezzjonijiet isiru darba kull ħames snin. L-oqsma ekonomiċi ewlenin tal-pajjiż huma t-turiżmu, il-moda, l-inġinerija, il-kimiċi, il-vetturi u l-ikel. L-Italja hija membru tal-grupp ta’ pajjiżi industrijalizzati magħruf bħala l-G8 u hija s-seba’ l-akbar ekonomija fid-dinja. Ir-reġjuni tan-naħa ta’ fuq ta’ l-Italja, ras imb’ras, huma fost l-aktar sinjuri fl-Ewropa. Wara li diġà kienet iċ-ċentru ta’ l-imperu vast Ruman li ħalla warajh patrimonju arkeoloġiku, kulturali u letterarju ferm qawwi, il-peninżula Taljana rat il-bidu ta’ l-umaniżmu medjevali u r-Rinaxximent. Dan kompla għen biex il-ħsieb politiku, il-filosofija u l-arti Ewropej ħadu surithom permezz ta’ personaġġi bħal Machiavelli, Dante, Leonardo u Galileo. Il-lista ta’ artisti famużi Taljani hija waħda twila, u tinkludi lil Giotto, Botticelli, Leonardo, Michelangelo, Tintoretto u Caravaggio. Dan il-pajjiż tana wkoll kompożituri ta’ l-opri bħal Verdi u Puccini u d-direttur tal-films Federico Fellini. Il-kċina Taljana hija fost l-aktar raffinati u varjati fl-Ewropa, mit-togħmiet pikkanti ta’ Napli u l-Kalabrija, sal-platti tal-pesto Ligurjani u dawk abbażi tal-ġobon u r-riżotto ta’ l-Alpi Taljani. |
